‘व्हॅक्सिन ऑन व्हिल्स’ उपक्रमाअंतर्गत पुणे महापालिकेने तीन लाख ११ हजार ६५३ नागरिकांचे लसीकरण​ केले आहे. याचा सर्वाधिक लाभ झोपडपट्टीवासियांना झाला असून, एक लाख ७२ हजारहून अधिक झोपडपट्टीवासियांना लस मिळाली आहे.

काही कारणांमुळे लसीकरण केंद्रांवर न पोहोचू शकणाऱ्या किंवा अन्य कारणाने लसीकरणापासून वंचित राहिलेल्या नागरिकांसाठी हे अभियान राबविण्यात आले होते. महापालिकेने या अभियानासाठी दोन लाख ७९ हजार नागरिकांच्या लसीकरणाचे उद्दिष्ट ठेवले होते. प्रत्यक्षात तीन लाख ११ हजार ६५३ नागरिकांनी या उपक्रमाचा लाभ घेतल्याची माहिती महापालिकेचे अतिरिक्त आयुक्त रवींद्र बिनवडे यांनी दिली.

‘व्हॅक्सिन ऑन व्हिल्स’अंतर्गत परदेशी जाणारे विद्यार्थी, नोकरीसाठी जाणारे नागरिक, टोकियो ऑलिम्पिकमध्ये सहभागी झालेले खेळाडू, ‘यूपीएससी’चे विद्यार्थी, जिम प्रशिक्षक व शरीरसौष्ठवपटू, माध्यम कर्मचारी, पेट्रोल पंप कर्मचारी, स्वयंसेवी संस्थांचे कर्मचारी, झोपडपट्टी, अंथरुणाला खिळून असलेले नागरिक, बांधकाम कामगार, घरेलू कामगार, दिव्यांग, वृद्धाश्रमातील वृद्ध, साधूसंत, तृतीयपंथी, देवदासी, पथारी व्यावसायिक आदींचा समावेश होता.

लसीकरणाचा आढावा घेतल्यानंतर झोपडपट्ट्यांतील नागरिकांत लसीकरणाचे प्रमाण कमी असल्याचे पुढे आले होते. त्यामुळे महापालिकेने ‘व्हॅक्सिन ऑन व्हिल्स’ उपक्रमाअंतर्गत थेट झोपडपट्ट्यांमध्येच लसीकरण सत्रांचे आयोजन करण्यास सुरुवात केली. १९ ऑक्टोबरअखेर या उपक्रमाअंतर्गत झोपडपट्ट्यांत एक लाख ७२ हजार ७८४ नागरिकांचे लसीकरण करण्यात आले आहे. वैद्यकीय कारणांमुळे अंथरुणाला खिळून असलेल्या ७८३ रुग्णांनाही घरपोहोच लस मिळाली. १९ हजार ५०४ सरकारी कर्मचारी, तर ‘फ्रंटलाइन वर्कर्स’ गटातील ८,६४४ कर्मचाऱ्यांना ६,३४० दिव्यांग नागरिकांना, तर २,६०५ देवदासींना लस देण्यात आली. या उपक्रमाअंतर्गत सर्वाधिक (९९,५३९) लसीकरण ‘सुपर स्प्रेडर’ गटात झाले. यात २१ हजार २८४ पथारीवाले, फळे भाजी विक्रेते, दुकानदार व फेरीवाल्यांना लस देण्यात आली.

व्हॅक्सिन ऑन व्हिल्सचे लाभार्थी

झोपडपट्टीवासीय : १,७२,७८४

बांधकाम मजूर : ३३,९१२

घरेलू कामगार : २७,९७२

सरकारी कर्मचारी : १९,५०४

महाविद्यालयात मिळणार लस

शहरातील महाविद्यालये सुरू झाली आहेत. या पार्श्वभूमीवर अद्याप लसीकरण न झालेले किंवा दुसरा डोस बाकी असलेल्या विद्यार्थ्यांना त्यांच्या महाविद्यालयात लस दिली जाणार आहे. या संदर्भात गुरुवारी महापालिकेतर्फे उच्च शिक्षण विभाग व महाविद्यालयांच्या प्रतिनिधींची बैठक घेण्यात आली. महाविद्यालयांकडून अपेक्षित लाभार्थ्यांची यादी मागविण्यात आली असून, त्याप्रमाणे लसीकरणाचे नियोजन केले जाईल.

शहरात एकही पात्र लाभार्थी लसीकरणापासून वंचित राहू नये, यासाठी ‘व्हॅक्सिन ऑन व्हिल्स’ उपक्रम राबवला जात आहे. त्यामुळे शहरातील शंभर टक्के लसीकरणाचे उद्दिष्ट साध्य होण्यास मदत होईल.

– रवींद्र बिनवडे,

अतिरिक्त आयुक्त